fyrstu vorverkin - og töfravettlingar!

Það er ekkert hægt að þræta fyrir það lengur að vorið er komið, mér til mikillar ánægju þar sem þetta er uppáhaldsárstíðin mín. Sólin fer að skína, gróðurinn tekur við sér, páskarnir (mmm, súkkulaði) og afmælið mitt... það er líka svo góð stemming á vorin, enginn kominn með leið á að grilla og allir glaðir þótt það sé gluggaveður. Við drifum okkur út í garð í sólskininu í gær og hófumst handa við að stinga upp, tína rusl, sópa, raka og aðeins snyrta til í garðinum eftir veturinn. Úlfur veit fátt skemmtilegra en að taka þátt í svona brasi og lék á als oddi, of upptekinn til að horfa í myndavélina enda ótrúlega vinnusamur og duglegur miðað við að vera bara á fimmta ári. Ósk fékk í fyrsta sinn að sitja sjálf í grasinu og leika sér, hún dundaði sér þar heillengi og lét ekkert hafa fyrir sér. Næst á dagskrá er svo að fara að sá kryddjurtunum og undirbúa matjurtagarðinn fyrir sumarið.

Alltaf þegar ég prjóna leikskólavettlinga á Úlf enda þeir á því að þæfast og minnka rosalega því þeir blotna í útileik á leikskólanum og eru svo settir á rjúkandi heitan ofn svo þeir nái að þorna (Svo týnast þeir líka alltaf á endanum. Það er eitthvað vettlingasvarthol í alheiminum fullt af vettlingum sem ég hef prjónað á þennan dreng). Ég ákvað að halda áfram að klára kambgarnið í garnbanaáskoruninnni og prjónaði þessa röndóttu vettlinga í minni stærð, náði að klára marga marga pínulitla hnykla sem höfðu verið að þvælast fyrir mér, og svo setti ég þá í þvottavélina og þæfði þar til þeir voru passlegir á Úlf. Úlfur fékk einmitt að fylgjast með. Honum fannst þetta vera mestu töfrar og kallaði þvottavélina bara "Minnkarann", haha. Ég gætti þess að skrifa uppskriftina niður svo ég geti gert fleiri seinna og er fegin því þeir heppnuðust svo vel og eru eiginlega algjört æði. Og þá er líka áskorun mánaðarins frá.

annað leynisjal

Ég lét nýlega tilleiðast (þurfti reyndar ekki miklar fortölur) að vera með í öðru leynisamprjóni, að þessu sinni eftir uppskrift Romi Hill sem hefur hannað margar fallegar flíkur og ekki síst sjöl. Þetta samprjón er einmitt sjaluppskrift og er höfð tvílit með ansi miklu blúnduprjóni. Ég ákvað að gera svolítið vel við mig og prófa að prjóna úr Juno garninu sem fæst í Litlu Prjónabúðinni, svakalega mjúkt og lipurt merínógarn sem er handlitað og litirnir eru sjúúúklega flottir. Mínir litir heita Canopy og Deep Sea og þeir minna mig helst á litapallettuna í mörgum verkum Kjarvals. Ég hlakka rosalega til að fara að ganga með þetta sjal og hamast við að prjóna. Það skemmtilegasta af öllu er þó að í nýjustu vísbendingunni, sem er sú þriðja af fimm, er smá kaðlaprjón sem ég er einmitt nýbúin að læra og leiðist ekki að fá að æfa mig í!

mánudagur: búið og gert!

Loksins heyrist frá mér! Ég hef verið mjög dul handavinnulega séð undanfarið, allavega hér á alnetinu, því ég tók upp á því að hanna mína allra fyrstu uppskrift með tilheyrandi tímagleypugangi og fyrirhöfn. Flíkin er leyndó enn sem komið er og því lítið af afrakstri til sýnis hér í dag. Ég fékk á sama tíma leið á að vera með mörg verkefni í gangi (ókei, hefði getað sagt mér það fyrirfram en stundum þarf að prófa til að vera viss) og þegar ljósbláa peysan var sett á ís vegna villu í uppskriftinni langaði mig næstum að hætta við þetta alltsaman. Í staðinn ákvað ég að fara í "klára"átak og klára bara sem flest verkefni svo ég geti snúið aftur til einfaldara prjónalífs. 

Fyrst á dagskrá var að klára þessa yndislegu vettlinga þar sem mér var alltaf kalt á höndunum (gömlu orðnir götóttir) og ég var líka viss um að um leið og ég lyki við þetta par kæmi vorið og vettlingar yrðu óþarfir. Veðrið í dag rennir stoðum undir þessa kenningu mína en vettlingarnir eru vel þegnir fyrir því. Uppskriftina er hægt að nálgast í íslenskri þýðingu (sjá Ravelry verkefnið) og ég var rosalega fljót að komast upp á lagið með kaðlaprjónið þrátt fyrir að vera algjör byrjandi á því sviði. Snælda er alveg ótrúlegt garn, þið verið að prófa ef þið hafið ekki gert það nú þegar! Það mýkist um helming í þvotti og verður svona "flöffí" eins og sést á myndunum hér að ofan. Algjör dásemd. 

Ég átti líka eftir að gera afgangaverkefni fyrir marsmánuð. Þar sem mér fannst svo skemmtilegt að prjóna Belluvettlingana og Ósk vantaði einmitt vettlinga (lesist: vettlinga sem hún gæti ekki náð af sér sjálf... barnið er algjör Houdini þegar kemur að því að rífa allt af höndunum á sér) skellti ég í pínulítið Bellupar handa henni. Ég notaði eitthvað ullargarn sem langamma gaf mér. Það var miðalaust þegar ég fékk það svo ég veit ekkert hvaða tegund það er, en ég notaði tvöfalt til að gera vettlingana aðeins stífari. Gerði þá á prjóna 3,5 og fitjaði upp 27 L í stað 35, hafði líka kaðlana þannig að þeir gengu upp í 8 lykkjur en ekki 12. Þess vegna eru þeir aðeins flatari en mínir. Ég er mjög ánægð með þá og finnst gaman að við mæðgur eigum eins :) Og það besta er að barninu virðist enn sem komið ómögulegt að ná þeim af sér. 

Nú er ég bara með fjögur verkefni í gangi: eitt leynisjal í samprjóni (stóðst ekki mátið...), peysuna hans Odds, heklaða langömmuteppið og ljósbláu peysuna. Áfram með klárið! 

mörg mörg verk í vinnslu

Ég er með ansi mörg verkefni á prjónunum núna og það er eiginlega ekki tilviljun því ég fékk um daginn svo svakalega löngun til að vera með margt í gangi í einu og geta skipt á milli að ég ákvað að láta það bara eftir mér. Það má! Hér að ofan sjást annars vegar Belluvettlingar sem ég er að byrja á (ísl. þýðing af uppskriftinni hér, mjög þakklát fyirr hana :) úr 5 þráða færeysku Snældugarni og hins vegar peysan Strýta sem ég er að prjóna á Odd nema hvað ég breyti uppskriftinni aðeins eftir hentugleika; sleppi munstri á ermum og bol, hef hana rennda og með hettu. Svo fer ég upp um hálfa prjónastærð því hún er líka úr 5 þráða Snældu. Það garn hefur lengi verið á óskalistanum og veldur engum vonbrigðum. Svakalega mjúkt og prjónast fallega.

Vettlingarnir eru fyrsta tilraun mín í kaðlaprjóni og það er ekkert eins flókið og ég hélt að það væri heldur bara fáránlega skemmtilegt. Kemur reyndar ekki á óvart þar sem ég elska útprjón og þetta er nú dálítið sama pælingin. Ég ætla að reyna að vera fljót að klára þá því þeir eru hluti af prjóna-meira-á-sjálfa-mig prjónaáramótaheitinu og gömlu vettlingarnir mínir eru að detta í sundur. Sem kemur sér ekki vel í snjónum um þessar mundir. Hvað rekur meira á eftir manni í vettlingaprjóni en blautur snjór og götóttar vettlingalufsur? Ekkert. (Nema kannski að maður ætti enga vettlinga fyrir).

Ég er líka að vinna í þessu fallega teppi sem langamma mín og nafna hefur verið að hekla fyrir Ósk langalangömmubarn. Mér finnst handverkið hennar ömmu svo fallegt og litirnir sérstaklega flottir. Því miður er hún orðin frekar slæm í höndunum og treystir sér ekki til að klára og ég tók það glöð að mér. Eins og sést á myndinni á bara eftir að festa síðustu dúllurnar við og gera kant. Ég er montin af að vera treyst fyrir fráganginum, mér finnst líka alltaf gaman að hekla teppi og þetta er engin undantekning. 

Aðalverkefnið þessa dagana er samt Morganite peysan mín sem ég er komin ansi langt með, búin með bol og næstum báðar ermar. Ég er komin með leið á að vera með hana á hliðarlínunni og farið að langa að klæðast henni, þannig að ég lofaði sjálfri mér að klára þetta í mars. Sjáum hvort það tekst ekki örugglega! Svo er ég með tvö leyniverkefni í startholunum líka sem ég er ekki enn tilbúin að deila, t.d. eina uppskrift sem býr í kollinum en verður vonandi sett á blað/í garn einhverntíma.

Þangað til næst - bestu prjónakveðjur! 

mánudagur: búið og gert!

Pattern: Hue, vanter og krave by Lene Holme Samsøe

Published in: Babystrik på pinde

Yarn: Geilsk Bomuld og uld

Needles: 2,5 mm og 3 mm

Ég mundi allt í einu í síðustu viku að ég átti alveg eftir að gera verkefni úr afgöngum eða birgðum fyrir febrúarmánuð. Góðgerðateppið var í raun aukaáskorun og ekkert febrúarverkefni enn á prjónunum. Mig hafði lengi langað að gera lítinn kraga á Ósk svo hún þurfi ekki alltaf að vera með lambhúshettu og átti einmitt uppskrift af einum í Babystrik pa pinde og yndislegan bómullar/lambsullarafgang frá Geilsk síðan ég prjónaði röndóttu peysuna hans Úlfs síðasta sumar. Tölurnar keypti ég í Ömmu mús í haust þegar Ósk var alveg glæný og mér fannst þær svo tilvaldar á eitthvert krúttustykki handa henni. Kraginn er í stærð 6-12 mánaða og er svolítið stór á hana ennþá, meira eins og herðaslá reyndar, en voða hlýr og mjúkur og sætur. Svo varð hún 6 mánaða í gær þannig að ætli þetta verði ekki farið að passa bara alltof fljótt *andvarp* Já, tíminn líður!

mánudagur: búið og gert!

Pattern: Follow Your Arrow MKAL by Ysolda Teague

Clues: BBBAA

Yarn: Yaku superwash wool 

Needles: 4.0 mm

Loksins, loksins kláraði ég leynisjalið og þegar ég tók það af prjóninum var það svona fimm sinnum flóknara og flottara en ég hafði haldið. Rosalega ánægð með útkomuna, það er svo fínt og hlýtt og mjúkt og alveg einstakt líka. Þetta var fyrsta leyniprjónið og fyrsta samprjónið sem ég tek þátt í og mér fannst þetta mjög gaman, alltaf spennandi að bíða eftir nýrri vísbendingu og sjá hvernig sjölin hjá hinum komu út. Tek alveg bókað þátt í svona aftur. Ég sé það líka eftir á að ég hefði sennilega aldrei þorað að prjóna svona flókið sjalmunstur, hefði bara ekki treyst mér í það. Nú veit ég að ég fer léttilega með það og er strax farin að plana næsta sjal. Af þessu má læra að leyniprjón getur hjálpað manni að komast yfir ranghugmyndir um eigin vankunnáttu :) Ég sé ekki fram á að taka þetta sjal neitt af mér á næstunni. Og nú er ég líka strax byrjuð að efna prjónaáramótaheitið um að gera meira á sjálfa mig. Prjónasjálfselska má alveg vera komin til að vera mín vegna ef ég verð svona ánægð með allt sem ég geri handa mér!

einn lítill vorboði

Það var að koma út nýtt Pom Pom blað! Ég skoðaði það í Litlu Prjónabúðinni síðasta fimmtudag og langar svona nokkurn veginn að prjóna hverja einustu flík (úff). Ég er reyndar nú þegar að vinna í Morganite peysunni minni og þó ég sé aaaalveg að verða búin með bolinn býst ég ekki við að fitja upp á neinu af þessu á næstu dögum. En kannski næstu vikum... 

Myndirnar eru fengnar af heimasíðu Pom Pom og eru allar úr nýja blaðinu, þar er líka hægt að kaupa vorblaðið, sem og eldri eintök, og lesa allskonar skemmtilegar prjónafréttir. Varúð - gæti valdið valkvíða!