síðbúin jólakveðja

Það er kannski fullseint að setja inn jólamyndirnar á þrettándanum en ég ætla að láta það sleppa því ég er búin að vera á leiðinni að græja þetta dögum saman og betra er jú seint en aldrei. Við litla fjölskyldan héldum okkar eigin jól á eigin heimili í fyrsta sinn og það heppnaðist svakalega vel. Gerum það alveg örugglega aftur. Ég naut þess að vera ekkert í prófum og dúllaði mér við að skreyta íbúðina, kveikja á kertum og hlusta á jólatónlist á milli þess sem ég hamaðist í jólagjafaprjóninu og -heklinu.

Mamma var svo sæt að prjóna þennan æðislega jólakjól á Ósk. Uppskriftin heitir að mig minnir Milla og er eftir Döggu í Litlu Prjónabúðinni en mamma keypti garnið einmitt þar, þessa djúsi fjólubláu Pimabómull frá Strikkebogen sem er á óskalistanum hjá mér yfir garn-sem-mig-langar-að-prófa. Kjóllinn hennar Óskar er í stærð 6 mánaða þannig að eins og sést er hann aðeins við vöxt en það er allt í lagi því þá getur hún notað hann heilmikið í vor og sumar. Ég nýtti svo tækifærið á aðfangadag meðan börnin lögðu sig og heklaði eitt pínulítið hárband í stíl.

Ég vona að jólin ykkar hafi verið yndisleg og allir skemmt sér vel. Takk fyrir að fylgjast með blogginu mínu á árinu sem var að líða og megi 2014 verða okkur öllum sem farsælast!

p.s. Ég gleymdi að taka mynd af ÖLLUM jólagjöfunum sem ég prjónaði áður en þær fóru í pakkana. Hahaha. Úps. Spurning um að muna það kannski næst.

bara smá

Ég var nú ekki lengi að svíkja loforðið um aukna bloggvirkni en það á sér reyndar alveg eðlilegar skýringar. Við mægður lentum í brjóstagjafaveseni sem átti tíma minn og athygli svotil óskipta í næstum hálfan mánuð og ég er bara fyrst núna farin að hugsa um eitthvað annað (afsakanir, afsakanir...) en það þýðir jú að loksins get ég dregið fram myndavélina og tölvuna af heilum hug. Mitt í öllu mjólkurstandinu snaraði ég fram fjórum litlum jólarósum til að skreyta aðventukransinn með, ég ákvað að nenna ekki að stífa þær en uppskriftin kemur úr Þóru - heklbók og er þar sem bókamerki. Mjög ánægð með þennan einfalda krans. Þarf samt að passa súper vel að gleyma ekki að slökkva a kertunum því garnið er auðvitað mjög eldfimt. 

Annars eru bara jólagjafir og aftur jólagjafir í vinnslu hérna. Ég gerði mér grein fyrir því að desemberáskorunin mætti ekki ræna dýrmætum jólagjafatíma og því verður verkefnið sett í jólapakka, ætla að hekla sæta hexagonpeysu úr kambgarnsafgöngunum mínum og reyna bara að hafa hana sem litríkasta. Eina verkefnið þessa dagana sem ekki er til jóla er sæta plómupeysan á Ósk sem ég svo píndi sjálfa mig til að setja ofan í skúffu um helgina þegar ég áttaði mig á því að nú eru ekki nema tvær vikur til stefnu...

Ekkert stress. Bara smá. 

koma vetrar

Þótt veturinn sé kannski sú árstíð sem fylgir hvað mest veðurtengt vesen er hann einmitt allra notalegasta árstíðin að mínu mati. Ég er því bara ánægð með veður og færð undanfarna daga. Tek það þó fram að þar sem ég er alin upp í talsverði hæð yfir sjávarmáli norður í landi finnst mér reykvískir vetur yfirleitt frekar nettir og jafnvel klénir á köflum. Veturinn er fyrir mér og fremst frábær bóka, vínyl og garntími, svo ekki sé minnst á te- og kaffidrykkju (ég er algjörlega háð kaffinu hjá þeim á Reykjavík Roasters uppi á Kárastíg) og svo langa, frískandi göngutúra og skemmtilegar sleðaferðir og útileiki með syninum. Njótum vetursins og látum fallegar myndir af internetinu fylla okkur innblæstri!

Eitt að lokum. Ég er í miklum rannsóknarhug þessa dagana og beinist forvitni mín helst að því hversu mikið af frábærum prjóna- og handavinnubloggum er að finna í netheimum. Flest eru þau erlend þótt skemmtileg íslensk blogg leynist líka inn á milli. Hugmyndin hjá mér er að niðurstaða þessarar rannsóknarvinnu verði heljarlangur tenglalisti hér á blogginu, ykkur til fróðleiks og skemmtunar. Ég rakst t.d. á frábæra samantekt af húfuuppskriftum (smellið á mynd) sem allar gætu komið sér vel í nú um mundir...

tveimur lokið - tíu eftir enn

Í morgun kláraði ég loksins vettlingana Litlar stjörnur, sem voru garnbanaáskorun októbermánaðar. Ég viðurkenni að ég var orðin pínulítið stressuð að ná ekki að klára fyrir mánaðamót en þetta slapp því enn eru tveir dagar í nóvember. Ekki það að þetta sé svo flókið og tímafrekt verkefni, þvert á móti, ég bara byrjaði alltof seint. Svo gerði ég líka smávægilegar stærðarbreytingar en misreiknaði mig aðeins í þeim og þurfti að rekja tvisvar upp áður en ég náði þessu réttu, það tafði talsvert. Mér finnst þetta mjög sætir vettlingar og mynstrið sérstaklega skemmtilegt. Það fór rosalega lítið af garni í þá þannig að mig langar að prófa að nota mynstrið kannski líka í húfu og vettlinga á Ósk - held að það kæmi vel út og nenni vonandi einhverntímann að tjékka á því. Það eru svo mörg verkefni á listanum yfir það sem mig langar að afreka í handavinnunni að ég held að ég kæmist ekki yfir að prjóna/hekla þau öll þótt ég gerði ekkert annað allan sólarhringinn! Kannast nokkuð fleiri við það?

En þá að nóvemberáskorunni! Þar sem aukaáskorunin er að nota ljótasta garnið sitt, þ.e.a.s. það garn sem manni sjálfum finnst ljótast, dró ég fram tvær stórar sjálfmynstrandi akrýldokkur sem ég keypti á fáránlega lágu verði í Rúmfó fyrir næstum fjórum árum. Þetta var svona korteri eftir að ég byrjaði að prjóna og hekla og mér fannst algjör snilld að hægt væri að fá svona mikið af garni fyrir svona lítinn pening. Svo þegar ég ætlaði að vinna úr garninu komst ég að því að mér finnst liturinn frekar ljótur og akrýl-áferðin alveg forljót. Ég er búin að byrja á nokkrum verkefnum úr þessu garni en alltaf rakið upp því ég er bara ekki nógu hrifin af því. En þar sem við ætlum að vera með í Jól í skókassa þetta árið datt mér í hug að sennilega væri sárfátækt barn í útlöndum ekki jafn neikvætt gagnvart þessu garni og ég og hefði jafnvel bara gagn og gaman að því að fá peysu úr því. Þess vegna ætla ég að styðjast við uppskrift úr fyrri Prjónaperlubókinni og að einfaldri laskapeysu og reyna þannig að nota allt garnið. Ég stefni á að hún verið fyrir stelpu 3-6 ára og ef það verður afgangur ætla ég að gera eyrnaband í stíl. Og hér er aðaláskorunin: Þetta verður að vera tilbúið fyrir 8. nóv því 9. nóv er síðasti dagur til að skila inn skókössunum. Þannig að nú legg ég frá mér tölvuna og byrja á nóvemberpeysunni, ég prjóna ekkert svakalega hratt og veitir ekkert af tímanum...