barnaherbergi

Ég er þessa dagana aðeins að breyta í herberginu hans Úlfs og finnst mjög gott að skoða myndir af fallegum barnaherbergjum á netinu til þess að fá innblástur í verkið. Þetta eru svo sem engar rosalegar breytingar sem ég er að gera, aðallega að flokka aðeins leikföngin og fækka þeim. Í svona litlum herbergjum eins og hann á er það alveg nauðsynlegt. Það er líka eins og hann leiki sér meira ef valmöguleikarnir eru ekki of margir og leikföngin flæða ekki úr öllum döllum og hillum. Annars er hans uppáhaldsiðja þessa dagana að hlusta á sögur og tónlist í litla geislaspilaranum sem við gáfum honum í jólagjöf og púsla/perla/byggja legó á meðan. Mjög kósí og alveg hægt að gleyma sér í því með honum!

Reyndar er hann að fá nýtt rúm, er að fara úr barnarúmi í fulla stærð, 200x90, og mig langar svo ógurlega að prjóna rúmteppi sem getur fylgt honum út ævina og gefa honum í 5 ára afmælisgjöf í haust. Ég er mjög hrifin af uppskriftinni af Vetrarbylgjuteppinu frá Pickles, sjá mynd hér fyrir neðan, en mig langar að gera það í grænum tónum. Nú er bara að finna a) garn sem er ódýrt en samt fallegt b) tímann til að prjóna rúmteppi í fullri stærð. Trallalalalalalala. 

stofur og brosbarn

Elska allar þessar fallegu stofumyndir... er annars lítið að nota internetið þessa dagana og bloggið líður fyrir það. Hver nennir líka að hanga í tölvuni þegar svona gullmolar eru farnir að brosa til manns? 

elskuleg póstsending

Ég elska að fá skemmtilega pakka og bréf í póstinum og varð því ekki heldur en ekki kát þegar þessi gersemi barst mér á föstudaginn! Hún Dúdda sem bloggar á Elskulegt gerði þessa fallegu mynd fyrir mig eftir pöntun og mikið hlakka ég til að ramma hana inn og setja á sinn stað, sem er í vinnslu eins og er. Myndir af því síðar! En hér á facebook síðu Elskulegt er hægt að skoða úrvalið af tilbúnum myndum og svo er hægt að senda póst og panta sérstaklega, hafi maður sérstaka liti eða orð í huga. 

Takk, Dúdda :)

Annars fór helgin að miklu leyti í að taka til í geymslunni, fara smá í Ikea og vinna í svefnherberginu, sem er alveg að verða tilbúið. Ef ég næ góðum myndum set ég kannski nokkrar hér inn en þangað til er bara ein af instagram. 

Við hættum við að hafa hinar ósýnilegu bókastoðir og keyptum bara svona pínulitlar hillur í Ikea í staðinn. Kemur mjög vel út og sparar þvílíkt pláss í litla svefnherberginu okkar. 

svefnherbergið framundan

Framundan er langþráð yfirhalning á svefnherberginu okkar, við ætlum að mála og skipta um rafmagnsdósir og ljós, festa upp lampa og setja upp nýjar gardínustangir. Oddur er líka að pæla í að lakka gluggann og svo ætlum við að festa upp hillur og raða aðeins upp á nýtt þarna inn svo hægt sé að koma nýju barni fyrir með góðu móti. Mikið hlakka ég til að fá að raða öllu inn þegar búið er að mála og græja - þá kemur sér vel að hafa safnað góðum hugmyndum á Pinterest! 

Ein af bestu hugmyndunum sem ég hef fundið þar og ætla sennilega að hrinda framkvæmd er svona DIY ósýnileg bókahilla. Ég þarf nefnilega að fórna náttborðinu mínu á altar plássleysisins en einhversstaðar verð ég að geta lagt frá mér bækur, vatnsglös og haft næturgjafa-uglulampann minn... held að svona lítil bókahilla á veggnum við hliðina á rúmstokknum gæti verið fullkomin lausn. Meira síðar - og myndir :)

föt til sýnis

Ég væri alveg til í svona opinn fataskáp - fallega fataslá með fullt af fallegum fötum. Hægt að útfæra á svo marga ólíka vegu en alltaf svolítið rómantískt. Svo ég tali nú ekki um hversu skemmtilegt það er að hafa fötin sín meira fyrir augunum, það bara hlýtur að auka innblástur þegar maður er að setja saman oufit dagsins.